لهجة اهل القصيم وشويه من لهجه اهل الرياض
السلام علكيم و رحمة الله و بركاته
اشلونكم شخباركم عساكم قووووووووود
اليوم جايب لكم موضوع عن لهجااات اهل السعوديه
انتوا تعرفون ان كل منطقه لها لهجه خاصه فيها
بعضهاغريبه و تضحك وبعضها متعوديين عليها
واليوم جايب لكم لهجه اهل القصيم على شويه من الرياض
لان هذي اللهجه اللي فالح
يلا نبغى كل عضو يعرف كلمات من لهجه يعرفها يسدحها فيذا الموضوع
بسم الله نبدأ :
تسذا
.. المعنى واضح يعني كذا ولازم تقولها وانت ماد براطمك لتحت
فيذا ..
يعني فيذا . هنا . " حط العشا فيذا " يعني هنا
مير
..هذي مالها معنا بس اذا سمعته احد قالها اعرف انه من اهل الرياض الاصليين
غديه او غديها .. يعني كوده او كودها ... (( يعني بيفهمون الثانيه ))
مثل ما يقول الابو لولده التسبر " رح ادرس كود اخوانك يغارون منك ويذاكرون " او رح ادرس غديك تنجح باتسر وتطلع دختور ...
صزز
.. يعني صدق والا صززيه يعني صدقيه
زلابه .. يعني بطه مالها معنى ثاني
دبووووج .. هذي شينه يعين اذا واحد قالها لك تراه يسبك اقرب شئ له كمخه
دلخ ..انظر اعلاه
ء ء .
.وتطلع من الحلق مثل اذا جيتا لبزر وقلت له عطني الكوره بيقول لك " ءء " وبيرفع خشته فوووووق وهو يقولها ...معناها منيب او لا
هزع .
. يعني طمن او انزل شوي ,,, اللي تبي
منهو ..
افصلها لكلمتين وتعرف معناها
مهوب او مهيب.
.بالعربي ( ليس ) مثل " هذا الدفتر مهوب لتس يانوير هذا الدفتر لاختس دليّل "
هقوتي .
. يعني ( اظن ) مثل " هقوتي انه فيذا
توحي ..معناها تسمع ,,, اذا جيته تسلم على شايبن من شيابكم تهزع على راسه وتقوله مساك الله بالخير بيقول لك وشوووو ,, بتقول له انت توحي (( في وسط اذنه عشان يسمعك ) وبيقول لك من انت ولده ... الخ " طاش ماطاش دائم يقلوها
كتر .
.ويقول الوا! حد لاخوه وهم يتغدون من صحن واحد " لا تاكل من كتري يعني لا تاكل من نفس المكان اللي اكل منه "
جغمه .
. يعني جغمه !! مثال : صديقك راح الدكان وشرا ببسي واحد وقعد يشربه لحاله وانت عيونك شوي وتناتق تقوله ياااخي عطني جغمه ( اعتقد فهمتوها )
بصرك ..يعني بكيفك .... تقول لواحد تعال معنا ... ويقول لك لا منيب جاي ,, ترد عليه "بصرك
بعدي .
. يعني مثلا يقول الابو لولده ,,, بعدي ابوي . بس مدري وشلون تنشرح المهم معناه زين مهوب شين
امصع ..يعني اسحب بقووووووه مثل الام اذا قالت لولدها تراني بمصع اذنك لو ما درست اومثال اخر (( اتركي اخوك لاتمصعينه))
امحق
..هذي والله نشبه ما ادري وشلون اشرحها لكن ابحاول اعطيكم مثل اللي بيفهم زين واللي مهوب فاهم احسن يعني حبكت الا يفهم هذي .
المثل
: الابو يقول لولده ترااا باتسر ابيك توديني لزواج قصرانا يرد والد ويقول والله اسمحلي انا مواعد ربعي في الاستراحه عاد الابو يقول امحق من ولد عاد يرد الولد اقول خلاص
يدربي بمعنى انه مايدري وين الله حاطه
للمعلوميه يدربي غييير يتدربى
الاولى مثل ماقلت لكم
الثانيه امممم تعرفون كيف الواحد اذا كان سمين مايقولون له تمشي يقولون تدربى اسرع خخ يعني دحرج نفسك اتحدى احد فاهم
كنادر .
. تكرمون جزمه
زبيريه
..نوع من النعال تكرمون وهو احسن مبيد للصوارير والضواطير ! والحشرات الزاحفه الاخرى
سرسري .
.يعني سربوت سربوت ........ يعني داشر داشر ,,,,,,, يعني صايع في الشوارع وهو اسهل واحد يطيح في التتن تتن ......... دخان
برندا .
.ميراندا,, لان اول واحد قالها في القصيم كان مزكم وقال براندا
محلي
..مصدي
يا خزياه
..اكثر من يقولها العجز الله يخليهم لنا ولا يحرمنا من حتسيهم يعني انها استحت وهي وضع الاصبع تحت العين ومطهاااا الى ان تصل للفم
وهومصطلح ينتشر عند بعض الناس يقالهم مثل ماقلت مستحين ، وهم وجيه بن فهرة ووجه بن فهرة هو الوجه المغسول بمرق
مااااحبها هذي الكلمه خصوووصا اذا كنت بعرس وعجيز تناظرني بنص عين
صواني .
. رح للجنادريه وانت تعرف وشي ,, ترا مهيب السوق
سماط .
.ماله داعي تروح للجنادريه , رح لاقرب محل مواعين وقل عطني سماط ,,,,, مفرش ناكل عليه ومنول نسميه سفره
ملاس ..ملعقه كبيره مخفسه ننتسب بها الغدا
مراصيع
.. قطرت سعبواتي ، اسالواماتكم ويعلمونكم عنها تراها تنوكل
ترم ترم..فلم كرتون نسميه منول ترم ترم وبعض البزران يسميه ابو تتنه (! ( اللهم لك الحمد ))
وغيرهم يسميه ابو ذنب (( ياربي لك الحمد ))
وعيال النعمه يسمونه النمر الوردي وهو اصلا بنك بانثر
قاف ..منطقه غير معروفه احتارو فيها اكبر علماء الجغرافيا والتاريخ والفلك والاثار في تحديد مكانها ودايمن تقول الام لولدها اذا ازعجها " رح في قاف "
عوافي الله .
. هذي الكلمه عقدت كل البزران دايمن تستخدمها الامهات لتخويف البزران اذا بغو يطلعون للشارع بالليل وتقول ترا بتجيك عوافي الله
" أغديه "
وتعني : كوده !! ،، وفسر الماء بعد الجهد بالماء
" ومصع "
دعوة عند القصمان وتأتي بعدة أوزان : مصع ، يمصع ، ممصوعا ،،
مثال مصعك الشر قولي امين
" ياهملالي "
منتشرة عند النحوتين والنظولين
مثال :منيره : مادريتي مريم توظفت ؟ ،، حصة : ياهملالي عندها واسطة<<< منقهررررة
" أويق "
هذه الكلمة تنتشر عند الملاقيف ، معناها أناظر وأناظر معناها أشوف !! ولها نطق اخر هكذا اويدزز
مثال : حصه : خير وش عندتس رازتن خشتس عند الدريشة " النافذة " ؟؟ ،، منيره : أبد ، أويدز على اللي يفحطون
" أعبطه "
أعجنه واسويبه فطاير
" قوه "
كلمة من أصل إنقليزي " والله محنب سهلين "
معناها تخاويني؟ ، مثال : حصة : قوه معي للسوق ،، منيره: مشينا ، كلش إلا السوق ، تخاويها وهي مغمضه
" حوّل "
وراكم طيرتوا عيونكم ياشباب، ترى منيب بالنجدة ، بس حوّل يعني : انزل
" شنق "
لحووووول ترى عندنا كلمات كذا تدل على الاجرام بس هذي غير اللي تعرفون هذي تعني : جهة
" هماه "
وتجي بمعنى " مب كذا - مو "
" نيم "
وتعني : نائم
" تهقى "
تعني : تظن؟ ، والاسم منها " هقوتي " اي أغلب ظني
مثال :مريم: تهقين حصه تجي ؟ والله ما اهقى انها تجي وراها هالكشة تستشورها
" بوه "
أهم مصطلح عند القصمان ويوضع بآخر الكلمة مثال : وشبوه ، جبتوه ، مادريتبوه ، وينهوبوه، وتقول هالكلمة وانت ماط بوزك شوي
بوة = فيذا – هووون - هينا
نيم = خامد – راقد – فاخ ويقال ايضا سليب او نايم
يمسط===>يطيح طيحتن قوية على وجهه ويقال يمسط به يعني يرميه على الارض رميتن قشرا
يجعر===> يبكي بكاءا شديدا وبحرارة ترجمتها يبتسي - يفاحس _ يصيح بصوت عالي _ بيعيط
يبوبز===>يجلس جلسة القرفصاء – سيم سيم كلام رياضي يجلس على اطراف اصابعه ,
يطبح (بتشديد الباء مع الكسرة)===>يطب من مكان عالي= يمحط
حقنة===>نشبة وتقال اللي يزيدون بالالحاح = ممكن تنقال غثيث ومره سمعت ناس يقولون عنها لهده
وش كارك من ====>يعني وش دخلك بي_ عن اللقافه
ينهج==>يسرع في تلبية الطلب ويقال انهج جبلي القهوة = يزت = بسرعه = عجل = ماتعوئش
بساقتوه===>خلفه ويقال يمشي فهد و عمر بساقتوه = وراوه
القرمه==>السنعة ... احد ناداني
اقول صد ( بفتح الصاد وتسكين الدال ) = يعني اقول ماصارت
وطبعا الواو و الهاء مرافق خاص لاغلب الكلمات مثل ’’
هاتوه - حطوه - خلوه - جبوه - بلاوه - قيمتوه - وهكذا
منطالع ) يعني ( برا )
( انهج ) يعني ( امقط ) بتشديد الميم - انجليزية الأصل -
( هالحزه ) يعني ( هذه اللحظه )
( كل بالشاطره ولا تاكل بالعفنه ) يعني ( كل باليد اليمنى ولا تأكل باليد اليسرى )
( تلقاوه بلهد النفود من غاد ) يعني ( تجده في طرف الطعس من الخلف )
( مير ) تعني ( لكن )
( لغديه ) يعني ( كوده ) واضحه ما يبيله تفسير
( واخزياه ) يعني ( استح على وجهك )
( رح وق - وتس- من اللى عند الباب ) أظنكم فهمتوها من خلال سياق العباره المفيده
( قوه ) يعني (مشينا)
( العاير ) يعني ( طرف البيت )
( قصيرنا ) يعني ( جارنا )
( ذروق ) يعني ( خواف )
( احتسوا البرد ) يعني ( استعدوا للشتاء )
( خشير ) يعني ( شريك )
( صلط ملط ) يعني ( عراة ليس عليهم شيء )
يارب شرحت صح
وبس والله تعبت
يلا وش رايكم
مـــنـــقـــوول
بـــــــــــ ي ــــــــس
موضوع: لهجه اهل القصيم 
الخميس يناير 29, 2009 12:04 pm